Dit maak nie saak hoe lank ons reeds met God onderweg is nie, daar sal altyd uitdagings wees om te oorkom, berge om te klim, storms om te verduur en gevegte – intern en ekstern – omdat die lewe kompleks is en dit is hoe Hy ons toets.

 

Om net te glo, is nie genoeg nie. Dit is slegs wanneer ons geloof tot aksie oorgaan en ons ons oë op God gerig hou dat ons kan sien hoe Hy vir ons sorg, en hoe getrou Hy ons onderhou. Dan groei ons verhouding met Hom. Maar wanneer ons Hom net as vanselfsprekend aanvaar, is ons blind hiervoor en verloor ons die seën van sy teenwoordigheid.

 

Soms is ons nie gemaklik met die manier waarop God ons gebede verhoor nie. Toe die Israeliete in slawerny in Egipte was, kon hulle nie voorsien het hoe God hulle gebede om bevry te word, sou antwoord nie. Hulle het ook nie besef dat na hulle bevryding daar steeds dikwels van hulle verwag sou word om te bid, moed te skep en in geloof en vertroue na vore te tree nie. Van begin tot einde het dit dissipline geverg.

 

Hulle ontvlugting was fyn beplan, en Moses se instruksies moes presies gevolg word sodat hulle in hulle groot getalle kon vertrek. Selfs vryheid, al kom dit van God, verlang ons samewerking – gehoorsaamheid in die kleinste detail, nie net dankbaarheid vir die uitkoms nie. Die woestyn was moeilik, maar God was regdeur in beheer – hulle het al die pad niks kortgekom nie, en hulle klere en sandale het nie verslyt nie. (Deuteronomium 29:5)

 

Merkwaardiger as hierdie wonderwerke – klere, kos en water – het hulle letterlik gesien hoe God hulle lei, deur 'n wolk in die dag en deur vuur in die nag. Hy het met hulle gepraat in woorde van liefde en hulle sy weë geleer.

 

Hy het hulle gevangenemers verslaan en hulle op arendsvlerke gedra en beloftes aan hulle gemaak: "As julle dan nou getrou luister na my stem en my verbond nakom, dan sal julle onder al die volke my persoonlike eiendom wees, al behoort die hele aarde aan My. Vir My sal julle 'n koninkryk van priesters en 'n heilige nasie wees.’ " (Eksodus 19:5-6a)

 

Van watter lot het God jou gered?

 

Ons voel soms of ons slawe in Egipte is, of verlore in die woestyn – en tog kan ons moed skep wanneer ons na Hom draai en besef dat Hy sterk is en ons op "arendsvlerke" dra.

 

Dit is dikwels egter eers na 'n moeilike tyd dat ons terugkyk en besef dat Hy ons deur dit alles gedra het. Sy verbond en beloftes is ook vir ons as ons in geloof deur Jesus Christus, ons Here, sy stem gehoorsaam.

 

Gebed: Getroue Vader, dankie dat U ons dra, net soos U u volk van ouds gedra het. Leer ons om U in die woestyn te vertrou, ons oë op U gerig te hou en u stem te gehoorsaam sodat ons u verbondsliefde volkome kan ken. In Jesus se Naam. Amen