In Israel is die reënseisoen verbonde aan die winter, wanneer die meeste reën tussen Desember en Februarie val. Ná die winter, wanneer die laaste reëndruppels geval het en die grond begin warm word, breek daar ’n nuwe tyd aan – ’n tyd van groei, hoop en nuwe lewe. Hooglied gebruik hierdie natuurlike oorgang as beeldspraak vir iets baie dieper. Die einde van die reën en die begin van bloei simboliseer dat daar 'n nuwe seisoen in jou lewe kan aanbreek. Jy mag dalk pas deur ’n innerlike winter gegaan het – ’n tyd van verlies, eensaamheid, stilte en verlange. Maar die Here se stem roep jou tot nuwe lewe. Het jy dalk moed verloor? Hooglied bring ’n liefdesuitnodiging: “Staan op ... kom na my toe!”

 

Die skoonheid van hierdie teks lê in die poëtiese beskrywing van lente: die veld wat blom, die sang wat weer in die lug hang, die tortelduif wat sy vreedsame roep laat hoor. Dit is die simbole van nuwe begin – nie net in die natuur nie, maar ook in jou siel.

 

Die voorvye en die bot van die wingerde is tekens van God se voorsiening. Dis nie net mooi nie – dit is beloftes van vrug en vreugde wat weer sal kom. Wanneer God nuwe seisoene gee, kom dit met die geur van hoop en die smaak van lewe.

 

Hooglied is 'n liefdeslied, en herinner ons dat verhoudings ook deur seisoene beweeg. Dit is ’n wonderlike geskenk as jy iemand in jou lewe het wat jy met oorgawe kan noem: “my liefling, my mooiste.” In lentetye floreer verhoudings – daar is warmte, groei, opwinding. Maar soms gaan verhoudings deur herfs, en selfs winter – seisoene van afkoeling, misverstand of afstand.

 

Maar net soos jy nie ’n vyeboom of wingerd in die winter uittrek nie, so gee jy ook nie op op ’n verhouding wat deur ’n moeilike tyd gaan nie. Met liefde, sorg en tyd kan selfs ’n gebroke verhouding weer begin bot. Wanneer die Here die winter uit ’n mens se hart verwyder, kan jy weer met oorgawe sê: “my liefling, my mooiste …”

 

Mag hierdie week vir jou die begin wees van 'n nuwe lente. Mag die Here die koue en stil tye van jou lewe verander in seisoene van sang en blom. Mag jy sy voorsiening sien, en weer vreugde vind in jou verhouding met Hom en met ander.

 

Gebed: Here, ons verlang na die lente. Ons verlang na nuwe lewe in ons harte – na liedere van lof, en na blydskap in u teenwoordigheid. Kom maak alles nuut, Here: ons harte, ons hoop, ons verhoudings. Laat daar weer bloeisels bot, en laat die tortelduif weer koer. Amen.