God wil ons lei - 5 Maart 2025
Benescke Janse van Rensburg
Die woord van die Here is volmaak: dit gee lewe. Psalm 19:8a, 1983-vertaling
Ek lees 'n tydjie gelede interessante navorsingsresultate raak van 'n studie wat gedoen is om te bepaal of die daaglikse lees van ons Bybels werklik 'n impak op ons lewens het.
In die resultate van die studie is bevind dat diegene wat een maal per week Bybel lees, nie regtig verskil het van diegene wat nooit Bybel lees nie. Ook dié wat twee keer per week Bybel gelees het, het nie regtig 'n noemenswaardige verskil beleef teenoor diegene wat dit nie gedoen het nie. Drie keer per week het wel 'n effense verskil gewys, maar dit was steeds beperk. Die interessante was egter die verskil wat gevind is by diegene wat vier keer of meer per week hulle Bybels gelees het en in God se teenwoordigheid tyd deurgebring het.
Dié groep respondente se emosionele en geestelike gesondheid was beter. Eensaamheid het met 30% verminder, woedeprobleme met 32%, bitterheid in verhoudings met 40% en die kans op 'n buite-egtelike verhouding was 68% minder. Hierteenoor het 60% van die respondente aangetoon dat hulle nie meer 'n geestelike stagnasie beleef het nie en 200% was meer geneig om hul geloof met ander te deel.
Hoekom het die draaipunt op dag 4 plaasgevind? Is dit dalk omdat respondente só meer dae in die week saam met God eerder as sonder Hom bestee het?
In Matteus 6:33 (2020-vertaling) lees ons: “Soek eers die koninkryk van God en sy geregtigheid, en al hierdie dinge sal vir julle bygevoeg word.” In Spreuke 3:5-6 word ons herinner: “Vertrou volkome op die Here en moenie op jou eie insigte staatmaak nie. Ken Hom in alles wat jy doen en Hy sal jou die regte pad laat loop.” En in Psalm 19:8 staan geskryf: “Die woord van die Here is volmaak: dit gee lewe.”
Om God se karakter te verstaan, moet ons sy Woord lees. Die Bybel openbaar Hom as liefdevol, regverdig, barmhartig, en getrou. Hy wil ons daagliks lei. Die vraag is net of ons toelaat dat werk, familie en selfs sosiale media ons lewens vul en of ons doelbewus steeds ruimte vir Hom maak?
Gebed: Vader God, baie dankie vir u Woord wat volmaak is en lewe gee. Help my asseblief om my tyd te prioritiseer om stil te word saam met U. Praat asseblief vandag met my. Ek vra dit in die Naam van Jesus Christus. Amen.