Al val daar duisend aan jou sy en tienduisend aan jou regterhand — na jou sal dit nie aankom nie. Psalm 91:7, 1933/1953-vertaling

 

Vroeër die jaar het ek verstom gestaan oor die verwoesting wat die veldbrande in Los Angeles binne 'n kort tydjie aangerig het. Wat my selfs meer geraak het, was die wonderwerke te midde van die verwoesting.

 

Een só getuienis was toe 'n man huilend langs sy huis staan en vir God dankie sê. Sy huis was die enigste wat in twee blokke nie afgebrand het nie.

 

Daar is daagliks dinge wat rondom ons gebeur wat kan veroorsaak dat ons in vrees begin leef. Tog lees ons in Psalm 91:7: “Al val daar duisend aan jou sy en tienduisend aan jou regterhand — na jou sal dit nie aankom nie.” Ook in Openbaring 4:11a (1983-vertaling) staan geskryf: “Here, ons God, U is waardig om die heerlikheid en die eer en die mag te ontvang omdat U alles geskep het.”

 

In stede van toelaat dat dinge buite ons beheer ons begin beheer, kan ons ons geloof en vertroue in God plaas. Hy is Almagtig en in beheer en Hy is waardig om geprys te word. Sterkte.

 

Gebed: Vader God, baie dankie dat U my Beskermer is. Help my asseblief om nie vreesagtig te raak nie, maar eerder te alle tye my geloof en vertroue in U te plaas. U is waardig om geprys te word. Ek bid hiervoor in die Naam van Jesus Christus. Amen.