God is vol vreugde oor jou - 6 Maart 2025
Benescke Janse van Rensburg
Die Here jou God is by jou, Hy, die krygsman wat red. Hy is vol vreugde oor jou, Hy is stil-tevrede in sy liefde. Hy jubel en juig oor jou. Sefanja 3:17, 1983-vertaling
In September verlede jaar het die 64-jarige David Jones van Suid-Carolina in Amerika voor 'n groot uitdaging te staan gekom. Sy dogter sou in Tennessee trou, en hy wou die spesiale oomblik saam met haar beleef. Orkaan Helene het egter veroorsaak dat al die paaie soontoe gesluit is.
Vasbeslote om nie moed op te gee nie, het David sy rugsak met sy trouklere, 'n skeerstel en 'n windbreker gepak en soontoe begin draf. Die meer as 40 km-roete was 'n moeilike een. Soms moes hy deur die omgewaaide bome, rommel en gladde modder klim en in 'n stadium het hy selfs knie-diep in die modder vasgesit. Dit het David egter nie gekeer nie.
Met net 'n paar kilometer tot by die kerk, het 'n ou kollega hom langs die pad herken en hom 'n rygeleentheid soontoe gegee. David was net betyds om te stort en aan te trek sodat hy saam met sy dogter by die paadjie kon afstap.
Hierdie storie wys vir ons iets van God se karakter. Net soos David nie toegelaat het dat die hindernisse hom van sy kind kon weerhou nie, het God nooit moed opgegee op ons nie. Hy het selfs verder gegaan deur sy enigste Seun vir ons op te gee sodat ons nie verlore hoef te gaan nie, maar die ewige lewe in sy teenwoordigheid kan beërwe. In Sefanja 3:17 lees ons verder: “Die Here jou God is by jou, Hy, die krygsman wat red. Hy is vol vreugde oor jou, Hy is stil-tevrede in sy liefde. Hy jubel en juig oor jou.”
Mag ons vandag opnuut bewus word van God se liefde vir ons elkeen. Hy is stil-tevrede in sy liefde. Hy jubel en juig oor jou! Sterkte.
Gebed: Vader God, baie dankie dat U vir my omgee en my liefhet. Help my asseblief in tye wat ek begin glo dat U van my vergeet het om opnuut te onthou wie U is. Ek vra dit in die Naam van Jesus Christus. Amen.