Laat ons mekaar dan nie meer veroordeel nie. Neem julle liewer voor om niks te doen wat jou broer kan aanstoot gee of tot 'n val kan bring nie. Romeine 14:13, 1983/1992-vertaling

 

Dit lyk vir my asof daar nog nooit 'n tydperk was waar daar nie een of ander geskil onder gelowiges was nie. Ons bly maar sukkel met die idee van ons denke wat vernuwe moet word. Ons kry dit net nie reg om weg te dink van geykte idees en waardes nie. Steeds bly ons fondamente grawe. Wanneer ons daarin slaag om die mure van die huis te bou, doen ons dit so dat die mure alles en almal rondom ons uitsluit. Vir baie deure en groot vensters is daar dikwels in ons huis nie plek nie. Daardeur word ons self so ingehok dat ons die vreugde om ander gelowiges te ontmoet misloop.

 

Toe Paulus dié brief in ongeveer 55 n.C. geskryf het, was daar in Rome 'n ernstige probleem met die sterkeres in die geloof wat die swakkeres verag het en laasgenoemdes wat weer die sterkeres veroordeel het. Hierdie onenigheid mag nie onder gelowiges bestaan nie en daarom gee Paulus hier riglyne hoe so 'n saak hanteer moet word. Ons kan vandag nog hierdie riglyne net so gebruik.

 

In Romeine 14:1 lees ons: “Aanvaar die een wat in die geloof swak is” en in Romeine 14:3 (2020-vertaling) skryf Paulus “moet die een wat wel eet, nie veroordeel nie.” Ons kan die gedagte uitbrei deur te sê dat ons mekaar oor kerkgrense en selfs verskillende interpretasie van die Skrif heen moet kan ontmoet. 'n Houding dat ek alleen die volle waarheid beet het, gee juis in die kerk van Rome aanleiding tot Paulus se oproep om mekaar te aanvaar.

 

Daarom die woorde van ons teksvers wat vra dat ons sal ophou om mekaar te veroordeel. Romeine 14:19 (2020-vertaling) sê nie verniet “Kom ons streef dan na die dinge wat die onderlinge vrede en mekaar se opbou bevorder” nie. As 'n huis gebou word en die bouers trek die hele tyd dwars oor hoe die bouwerk gedoen moet word, sal ons met 'n baie eienaardige huis sit. So ongelukkig ook met die kerk as liggaam van Christus.

 

Ons mag nie so bou dat die wêreld rede het om te lag oor ons vreemde bousel nie.

 

Gebed: Here, vergewe my asseblief wanneer ek na ander mense kyk en hulle as vreemdelinge sien. Bewaar my daarvan om neer te sien op mense wat anders lyk as ek, anders dink as ek en anders glo as ek. Amen