Vers n dag - 21 Februarie 2012
Tema vir die maand: ’n Nuwe begin…
DAG 32: BEGIN NUUT OM VRIENDE TE MAAK
Deur Benescke Janse van Rensburg
As ek soms deur van die e-posse van lesers lees of na gesprekke rondom my luister, wonder ek of daar nie ’n nuwe epidemie stil-stil tussen ons ingesluip het nie. ’n Kondisie wat jy nie met bloedtoetse kan diagnoseer nie, maar wat stadig aan jou siel vreet en jou selfvertroue vernietig. En dit? Eensaamheid.
Ek staan onlangs in ’n gesprek waar ’n vrou in trane vertel hoe sy soms so eensaam en alleen voel dat sy met haar kombuis se mure te gesels – net om te voel dat daar iemand saam met haar in haar huis is. Is dit hoe jy vandag voel?
Maar hoe maak mens nuwe vriende?
In 1920 het die sielkundige, George W Crane begin om ’n aandklas in sosiale sielkundige aan die Noordwes-universiteit van Chicago aan te bied. In een van sy klasse (wat meestal deur jong volwasse werkers wat daagliks in fabrieke, kantore en afdelingswinkels gewerk het, bygewoon is), het ’n meisie genaamd Lois gesit.
Nadat Lois ’n werk in Chicago gekry het, het sy haar vriende en familie in die klein plattelandse dorpie, Wisconsin agtergelaat en na Chicago verhuis. Hier het die eensaamheid haar oorweldig. Na een van die aandklasse het sy aan Crane vertel hoe geïsoleerd sy voel en hoe sy saans by die huis sit en briewe skryf aan haar geliefdes by die huis. Hierdie gesprek het Crane ’n idee vir ’n nuwe projek gegee, naamlik die “Komplimente Klub”.
Om die projek te slaag moes elke student vir dertig dae lank daagliks drie eerlike komplimente aan drie verskillende mense gee. Ook moes die student aan die einde van die dertig dae ’n opstel oor sy of haar ondervinding skryf wat insluit: Hoe het dit die mense om jou beïnvloed? En hoe het dit jou eie uitkyk op die lewe beïnvloed?
Alhoewel die meeste van die studente aanvanklik negatief oor die projek was en bang vir verwerping, het almal besluit om aan die projek deel te neem.
Terwyl George Crane die opstelle van sy studente na die projek deurgelees het, was daar telkens ’n glimlag op sy gesig. Nie net het elke student vertel hoe sy of haar eerlike komplimente ’n positiewe effek op die mense rondom hulle gehad het nie. Bykans al die studente het vertel dat hierdie projek hulle uitkyk op die lewe en hulle optrede teenoor hulle medemens totaal verander het.
Ook Lois se lewe is ingrypend verander. Met die hulp van die “Komplimente Klub”-projek het sy ’n sprankelende mens geword en in haar tyd in Chicago veel meer en beter vriende gemaak as wat sy ooit in Wisconsin agtergelaat het.
Voel jy vandag eensaam? Kan ek jou dan bemoedig met God se woorde in Hebreërs 13:5: “Ek sal jou nooit verlaat nie, jou nooit in die steek laat nie.”
Begin vandag om die “Komplimente Klub” se beginsels in jou lewe toe te pas. Reik eerste uit na die mense rondom jou. Soek na geleenthede om ander eerlik te komplimenteer. En wie weet, dalk mag jy nes Lois verbaas staan oor die verandering wat dit in jou lewe sal bring! Sterkte.
Vader God, baie dankie vir elke vriend en vriendin in my lewe. Help my asseblief om ’n goeie vriend vir hulle te wees, maar ook om uit te reik na ander wat ek kan sien alleen is. Ek bid dit in die Naam van Jesus Christus. Amen.
** Boekbekendstelling: Benescke se boek, Wysheid, oordenkings uit Spreuke word amptelik op Saterdag, 25 Februarie 2012 by die Bellville Wes-Kerksaal bekendgestel. Vir meer inligting, kontak Karin by 021 949 7419 of
**Benescke Janse van Rensburg is ’n motiveringspreker, radio-omroeper en skrywer van die boeke, Ontdek God in die stories van mense en ook Wysheid, oordenkings uit Spreuke.