Net meer as 'n jaar gelede het Marnus Coetzee en sy familie ervaar dat daar krag is in die Naam van Jesus Christus. Hier is 'n kort gedeelte van Marnus se getuienis.

 

Marnus: “Een Saterdagmiddag het ek en my gesin op ons kleinhoewe rondgery. Nadat ek hulle by die huis afgelaai het, is ek na een van die lande waar 'n trekker in die modder vasgesit het. In die proses om dit uit die modder te haal, het iets verkeerd geloop en toe ek my oë uitvee het die 2,5 ton-trekker met neus in die lug bo-op my beland. Met die trekkerwiel wat gevaarlik bo my kop draai, het die swaar voertuig al dieper in die modder begin insink. Ek kon voel hoe my bene en werwels kraak. In my binneste was ek oortuig dat ek sou sterf. In totale hopeloosheid, het ek hard begin om die Naam van Jesus uit te roep.

 

“My seun wat op daardie stadium voor die televisie gesit het, het skielik vir my vrou gesê dat hy na my toe gaan. Sy het saam met my seun by die deur uitgestap toe hulle my vir die laaste keer hoor roep: ‘Jesus!’ My vrou het in die voertuig gespring en na my gejaag. In skok oor my toestand, het my kinders in geloof hulle hande op my kop gesit en vir my begin bid.

 

“Die plaaswag is in kennis gestel en twintig boere het kom help. Die trekker is van my afgelig en ek is na die hospitaal gehaas waar die dokters x-strale geneem het. Dat ek nie ernstiger beseer is nie, was vir die dokters 'n absolute wonderwerk.

 

“Vandag kyk ek terug en ek het net 'n paar merke waar my arm heeltemal afgebreek het. God het my bonatuurlik genees en ek weet Hy was daardie dag by my in die modder. Hy het my gesin se gebede gehoor en dit is Hy wat my gered het!”

 

God is ons Redder. In Efesiërs 6:10 lees ons: “Verder nog dit: Soek julle krag in die Here en in sy groot mag.” Ook in 1 Kronieke 29:11 (2020-vertaling) staan geskryf: “Aan U, Here, behoort die grootheid, die sterkte, die luister, die roem en die majesteit – ja, alles in die hemel en op die aarde. Aan U, Here, behoort die koningskap, en U is as hoof verhewe bo alles."

 

Mag ons vandag weet dat daar krag is in die Naam van Jesus Christus. En God red steeds!

 

Gebed: Vader God, baie dankie dat ek kan weet dat ons ons krag in U kan vind. Help my asseblief om in tye van nood nie my hulp by mense te soek nie, maar eerste by U. Ek vra dit in die Naam van Jesus Christus. Amen.