Hy het gesê: “Julle moet ophou veg, julle moet weet dat Ek God is, Ek is hoog bo die volke, hoog bo die aarde.” Die Here wat oor alles regeer, is by ons, die God van Jakob beskerm ons. Psalm 46:11-12, Bybel vir almal

 

Die liedjie uit die Liedboek van die kerk is dalk klaar in jou kop.

 

Wees stil en weet Ek is die Heer

Ek spreek en wind en golwe bedaar

Ek sal ook jou getrou bewaar

 

Wees stil en weet Ek is die Heer

Ek ken jou pyn, jou donkerste nag

Ek is by jou, Ek gee jou krag

 

Wees stil en weet Ek is die Heer

Bly waak en bid, volhard in geloof

Ek is by jou soos Ek beloof

 

Die boodskap is duidelik – God is by ons, Hy bewaar ons en Hy sal ons dra deur die moeilike tye, die hartseer tye, die swaar tye en ja, Hy is ook daar in die vreugdevolle tye.

 

Hierdie lied is vir my ook ’n herinnering dat ek nie op my eie kragte hoef staat te maak as dinge te veel raak nie. Ek kan stil raak en na God draai.

 

Daar kom mos maar tye wat ’n mens voel jy kan net nie meer nie, jy het gewoon nie meer die fisiese of emosionele kapasiteit om te veg en te baklei teen die aanslae van die lewe nie. Daar kom ’n punt waar ’n mens net wil opgee. En weet jy wat? Jy kan maar oorgee aan God, jy mág net stil raak en vir Hom vra om jou te dra deur die moeilike of hartseer tye. Ons moet net volhard in geloof en aanhou om op God te vertrou.

 

Gebed: Vader, help my om stil te raak en na U te draai. Dankie dat U my bewaar en dra, maak nie saak waardeur ek gaan nie. Amen.